الإلغاء والاسترجاع

آخر تحديث: ١٨ سبتمبر ٢٠٢٦

الحجز في stylzt موعد بينك وبين الحلاق. هذي الصفحة تقول لك بالضبط متى تقدر تلغيه، ووش يصير لو ألغاه الحلاق، ووش يصير بأي مبلغ. وكل قاعدة فيها تنطبق على الطرفين بالتساوي.

كيف يمشي الحجز

1. ترسل طلب الحجز بالوقت والخدمة اللي اخترتها.
2. الوقت يُحجز لك من لحظة الطلب، بانتظار رد الحلاق.
3. إذا قبل الحلاق، أو مرّت ٣٠ دقيقة بدون رد، يصير الموعد مؤكداً ويوصلك إشعار.

متى يكلّف الإلغاء

الموعد المؤكد التزام من الطرفين. كل ما قرب الموعد، كل ما صار إلغاؤه أغلى، وبنفس النسبة على من ألغى، عميلاً كان أو حلاقاً.

قبل الموعد بـ ٢٤ ساعة أو أكثر

• أي طرف يقدر يلغي بلا أي خصم، ويوصل الطرف الآخر إشعار فوراً.
• كل مبلغ دُفع عبر التطبيق يُرد كاملاً إلى نفس وسيلة الدفع، ورسوم الحجز معه.

قبل الموعد بين ٤ و٢٤ ساعة

• يدفع من ألغى ١٥٪ من قيمة الحجز للطرف الآخر.
• إذا ألغى العميل: الباقي يُرد، ورسوم الحجز تُحتجز.
• إذا ألغى الحلاق: يُرد للعميل كل ما دفعه مع رسوم الحجز، ويُضاف الـ١٥٪ نقداً.

في آخر ٤ ساعات

• يدفع من ألغى ٣٠٪ من قيمة الحجز للطرف الآخر.
• إذا ألغى الحلاق: يُرد لك المبلغ كاملاً مع رسوم الحجز، ويُضاف الـ٣٠٪ نقداً إلى نفس وسيلة دفعك، مو رصيد داخل التطبيق.

عدم الحضور بلا إلغاء

من لا يحضر ولا يلغي يتحمّل قيمة الحجز كاملة. الإلغاء المتأخر يكلّف جزء بس لأن صاحبه بلّغ، أما اللي ما يحضر ولا يبلّغ فيتحمل المبلغ كله.

• إذا ما حضر العميل: لا يُرد له شي، لا قيمة الخدمة ولا رسوم الحجز ولا الرصيد اللي صرفه عليه، ويستلم الحلاق قيمة الحجز كاملة تعويضاً.
• إذا ما حضر الحلاق: يُرد للعميل كل ما دفعه، ويُضاف له قيمة الحجز كاملة مرة ثانية تعويضاً نقدياً، وهو نفس المبلغ اللي كان بيخسره العميل لو هو اللي ما حضر.

حالات لا ينطبق عليها شي من هذا

• طلب حجز لم يقبله الحلاق بعد: تلغيه في أي وقت بلا خصم لأن الموعد ما تأكد أصلاً، ويُرد كل ما دُفع عليه بما فيه رسوم الحجز. والحلاق يقدر يرفضه بلا خصم كذلك.
• بعد بدء الموعد أو تنفيذ الخدمة: ما ينفع الإلغاء من التطبيق. لو صار خلل، اعترض (تحت) أو راسلنا.

الإلغاء من التطبيق: حجوزاتي ← الحجز ← إلغاء الحجز. الحلاق يلغي من طلبات الحجز. ويظهر لك المبلغ اللي يُخصم واللي يُرد قبل ما تأكد.

بعد الموعد: من يقول إنه تم؟

الموعد ما يُعتبر منفَّذاً إلا إذا قال أحد إنه تم. السكوت ما يكفي، لأن السكوت ممكن يعني أن الحلاق ما فتح محله أصلاً.

• الحلاق يقدر ينهي الموعد بـتم، أو يبلّغ أنك ما حضرت. والبلاغ ما يُقبل قبل بداية الموعد.
• وأنت كذلك: تقدر تبلّغ أن الحلاق ما حضر خلال ٢٤ ساعة من الموعد، أو خلال مهلة الـ٤٨ ساعة إذا أُقفل الموعد تلقائياً. وقتها يُرد لك كل ما دفعته، وقيمة الحجز كاملة مرة ثانية تعويضاً. البلاغ حالياً من حسابي ← تواصل معنا، أو على [email protected].
• إذا أكّدت أنت أن الحلاقة تمت، ما تقدر بعدها تبلّغ أن الحلاق ما حضر. وإذا أنهاه الحلاق بـتم وأنت ترى أنه ما حضر، فهذا خلاف بين كلمتين، تحسمه الإدارة بعد ما تسمع الطرفين، وما فيه تعويض تلقائي.
• إذا مرّ الموعد ولا أحد قال شي خلال ١٢ ساعة، يُقفل الموعد تلقائياً عشان تقدر تقيّم، لكنه يُسجَّل أنه أُقفل بلا شهادة أحد، ويبقى لك ٤٨ ساعة تعترض فيها قبل أن يُعتبر مستحقاً.

تغيير وقت الحجز

تغيير الوقت غير الإلغاء: الكرسي ما يفضى، الموعد بس ينزحف. فقواعد الإلغاء ما تنطبق عليه بنفس الشكل:

• قبل الموعد بأربع ساعات أو أكثر: غيّر الوقت مجاناً، وأكثر من مرة، لأي وقت فاضي عند نفس الحلاق.
• في آخر أربع ساعات: تقدر تغيّره مرة واحدة مجاناً، لوقت آخر في نفس اليوم.
• في آخر أربع ساعات لوقت في يوم ثاني: ما ينفع، لأن هذا يعتبر إلغاء وتنطبق عليه قواعد الإلغاء.
• الموعد اللي تحرّك في آخر أربع ساعات يظل محسوباً «متأخراً» لمدة ٤٨ ساعة فقط. بعدها، إذا كان الموعد الجديد بعيداً، يرجع عادي.

الحلاق ما يحتاج يوافق على الوقت الجديد ما دام داخل دوامه المنشور وفاضي، ويوصله إشعار بالتغيير.

الحجز لشخص آخر

تقدر تحجز لشخص ثاني باسمه، ويظهر الاسم للحلاق، والدفع من حسابك أنت. وينطبق عليه نفس اللي ينطبق على أي حجز: تلغيه قبل ٢٤ ساعة يُرد كاملاً، وتلغيه متأخراً تدفع نفس النسبة.

المبالغ والاسترجاع

كل مبلغ يُرد يرجع إلى نفس وسيلة الدفع. وصوله يعتمد على البنك: بطاقات مدى من يوم إلى ٣ أيام عمل، والبطاقات الائتمانية إلى ١٠ أيام عمل.

رسوم الحجز (٤٫٦٠ ريال بعد فترة التجربة): تُرد كاملة إذا ألغيت قبل الموعد بـ٢٤ ساعة أو أكثر، أو إذا ألغى الحلاق في أي وقت، أو إذا كان الطلب لم يُقبل بعد. وتُحتجز إذا ألغيت داخل الـ٢٤ ساعة، إلا أول إلغاء متأخر لك كل ٩٠ يوماً، فيُرد فيه كل شي مع الرسوم. وأول حجز لكل عميل معفى من الرسوم أصلاً.

الرصيد داخل التطبيق اللي تكون صرفته على حجز يرجع لك رصيداً، لا نقداً. أما التعويضات فتُدفع نقداً.

إذا شفت أن الخصم غلط

اعترض. من التطبيق (حسابي ← تواصل معنا) أو على [email protected]، واكتب وش صار. يوصل الاعتراض للإدارة، ويقرأه واحد من الفريق ويرد عليك بقرار مكتوب. القواعد ما تغطي كل الظروف، مثل حلاق أغلق لوفاة، أو عميل انخصم منه لأن المحل هو اللي غيّر الموعد.

الإلغاء المتأخر يُسجَّل على الحساب في كل الأحوال، حتى المعفى منه. والحلاق اللي تتكرر إلغاءاته المتأخرة يُخفى من قائمة التصفح حتى يراجع الإدارة. يبقى حسابه وصفحته وعملاؤه، بس ما يطلع للعملاء الجدد.

تواصل معنا

لأي استفسار عن حجز أو مبلغ: [email protected]، أو من داخل التطبيق: حسابي ← تواصل معنا. نرد خلال يوم عمل.